انيقاتي الغاليات نهاركم مبروك ان شاء لله يارب تكونو جميع لباس عليكم
هاد لحليوة كنت شفتها فواحد الموقع اسباني وعجبتني بزاف حيت بسيطة وساهلة
وسميتها 3 في واحد
كنتمنى حتى انتوما تعجبكم نبداو بسم لله
المقادير : 300 غرام لوز مطحون يبقى شوية خشين
250 غرام سكر ممكن تنقص شوية من الحلاوة
50 غرام بطاطا مسلوقة ومطحونة
1 حامضة محكوكة
1 ابيض بيضة
هاد هو العجين الاساسي
وعندنا 50 غرام د الكوك + 50 غرام د لينوازيت + لوز إفيلي + 1 بيضة
السكر كنطحنو وحد الشوية ماشي بزاف عاد كنضيف عليه لبطاطا وقشرة الحامضة وابيض بيضة
ونخلطهوم مزيااان ونضيف عليهم اللوز ونغطي مزيان العجينة ببلاستيك غذائي ونخليها فالثلاجة
12 ساعة انا عجنتها فالليل وحتى لغدا مع 3 عاد كملت عليها
جبدت لعجينة قسمتها على 3 الطرف الأول ضفت عليه الكوك وخليت منو شوية
التاني ضفت عليه لينوازيت
الاخير مضفت عليه والو كنت غنضيف عليه الصنوبر ولكن ملقيتش باقي عندي حتى هو كيجي رائع
منبعد ما خلطت مزيان لعجينة مع الكوك عملت منها مستطيل وغطيتها بالكوك وضغطت عليه
بشوية باش يشبر وقطعتها بحال لي فالصورة
لي بلينوازيت عملت كويرة وفوسطها حبة نوازيت وعملت كورية فندت وجهها فلي نوازيت
والعادية عملت حريبلات صغار ودهنت وجههم بالبيض ولصقت عليهم لوز إفيلي
وعاود دهنتهم بالبيض كااااااملين وعملتهم يطيبو غير كيتحمرو شوية حيت فيهم غير شوية د
البيض مكيحتجوش بزاف وحتى يبردو عاد نحيدهم من الصينية باش ادا لصقو ميتهرسوش
وهاهي واجدة بالصحة والراحة
رغم انهم من نفس لعجينة الا انه كل وحدة كتجي بمذاق مختلف
وهاد لقليب هدية مني لأنيقات باش يدوقو
ملاحظة : ممكن استعمال اي نورع من المكسرات مثل الزنجلان والصنوبر وبيسطاش و كوكاو
كتبقى غير العجينة الاولى هي الاساس .
Aucun commentaire :
Enregistrer un commentaire